HALAGA NG BIGAS SA PANDAIGDIGANG MERKADO, BUMAGSAK MATAPOS NA MAGTAKDA NG HANGGANAN SA HALAGA NITO ANG PILIPINAS 

 

Idineklara ngayong Huwebes ni SPEAKER Ferdinand Martin G. Romualdez na ang malaking bawas sa halaga ng bigas sa pandaigdigang merkado ay maituturing na maaaring sanhi ng pagpapatupad kamakailan ng Executive Order (EO) No. 39 ng Malacanang, na nagtatakda ng hangganan sa halaga ng bigas sa buong kapuluan.

 

Ayon sa US-based Markets Insider, ang halaga ng bigas sa pandaigdigang merkado ay bumaba mula $384 kada metriko tonelada noong Hulyo, sa $332.4 kada metriko tonelada ngayong buwan.

 

“It is proven that the EO 39 of President (Ferdinand) Bongbong R. Marcos Jr. set commendable results not only in our country, (but in the world as well). We are hoping na magtuloy-tuloy na ang pagbaba ng presyo ng bigas,” ayon kay Speaker sa isang pahayag.

 

Naniniwala ang pinuno ng 311-miyembro ng Kapulungan ng mga Kinatawan na ang pagbagsak ng halaga ng bigas sa pandaigdigang merkado ay dahil sa malawakang kanselasyon na ginawa sa mga inaangkat na bigas ng mga nagosyante ng bigas sa bansa, sanhi ng pagkakatakda ng hangganan sa halaga nito.

“Siguro nung kinansel na nila (importers and traders) ang mga orders, biglang dumami tuloy ang stock sa abroad ng bigas,” ani Speaker Romualdez.

 

“It is obvious na artificial ang pagsirit ng presyo ng bigas sa mga palengke natin dahil tinatago 'yung mga bigas sa bodega as we have seen during our inspection,” dagdag niya.

 

Iginiit ni Speaker Romualdez na tumpak ang palasyo sa pagtatakda ng hangganan sa halaga ng bigas, dahil ito lamang ang tanging epektibong paraan para madismaya ang mga iligal na nag-aangkat at nagmamanipula sa presyo para muling isagawa ang kanilang mga iligal na gawain.

Samantala, inulit ni Ways and Means Committee Chair Rep. Joey Salceda ang sinabi ni Romualdez, at ipinaliwanag ba ang pagtaas sa halaga ng bigas sa pandaigdigang merkado ay artipisyal lamang dahil sa laki ng pangangailangan mula sa Pilipinas.

 

“We have seen this crisis before and we know how to deal with it,” ayon kay Salceda.

 

“Pero we should not over-import para hindi i-anticipate ng mga kapitbahay nating bansa at tumaas ng presyo ng bigas,” dagdag ni Salceda. “Ang paglalagay ng price cap ng Malacañang sa bigas ay nagpapakita na hindi katanggap-tanggap sa atin ang mga artificial na pagtaas ng presyo ng bigas sa world market.”

 

Nauna nang inisyu ni Pangulong Marcos ang EO 39 na nag-uutos sa pagtatakda ng hangganan sa halaga ng bigas sa: P41.00 kada kilo sa regular milled rice at P45.00 para sa well-milled rice. 

Ang hakbang ay ipinatupad matapos na makatanggap ang pamahalaan ng impormasyon na ilang mga walang konsyensyang negosyante ay nagpaplano na itaas ang halaga ng bigas hanggang P70.00 kada kilo.

 

“This remarkable development marks a significant shift in our agricultural landscape and offers hope for our local consumers,” ani Speaker Romualdez.

 

Sumama si Speaker Romualdez, kabilang ang ilang mambabatas sa serye ng mga sorpresang inspeksyon at pagsalakay ng Bureau of Customs (BoC) sa ilang bodega sa Bulacan na nag-iimbak ng bigas. 

Kamakailan ay nanawagan ang pinuno ng Kapulungan sa BoC at mga nagpapatupad ng batas na kasuhan at ipabilanggo ang mga smuggler at mga hoarder ng bigas. # wantta join us? sure, manure...