TANgGAL VAT SA KURYENTE

Iniutos ni Pang. Ferdinand Marcos Jr. na tingnan at pag-aralan ng Kamara ang posibilidad na tanggalan ng Value Added Tax o VAT sa ilang public utilities o serbisyo na binabayaran ng publiko, lalong-lalo na ang kuryente.

Ito ang kinumpirma ni House Committee on Ways and Means Chairman Joey Salceda, kasunod na rin ng pagbuhay muli ng Makabayan Bloc ng mga panukalang alisin ang 12% VAT sa “systems loss” ng kuryente, electric at water bills, pati sa toll fees.

Ani Salceda, ang kautusan ng presidente ay ipinarating sa pamamagitan ng intermediaries secretary noong Oktubre. Ito ay tugon na rin sa iba’t ibang isyu sa ekonomiya ng bansa, at para na rin sa “relief” o kaluwagan ng mga consumer.

Pagtitiyak ni Salceda, seryosong pinag-aaralan ng Ways and Means panel ng Kamara ang pag-alis ng VAT sa utilities, habang titingnan ang pagtaas ng “franchise tax” ng utility companies partikular sa tubig.

Punto naman ni Salceda, kailangang maging maingat at iwasan ang anumang “revenue negative action” o masamang epekto sa kita ng pamahalaan.

Hindi na nagbigay ng iba pang detalye si Salceda ukol sa kautusan ni Pang. Marcos, pero sinabi ang kongresista nagsumite na siya ng rekumendasyon sa Office of the President.

Sa oras din na maisalang ang mga Anti-VAT Bills sa Ways and Means committee, ay ilalahad din ang findings ng lupon.