Garin sa CHED: Gawing prayoridad ang scholarships 

Sinabi ni Deputy Majority Leader at Iloilo First District Representative Janette Garin sa Commission on Higher Education (CHED) na unahin ang pagbibigay ng scholarship sa mga estudyante sa halip na gamitin ang pondo para sa mga non-essential expenditures. 

Hinimok ni Garin si CHED Chairperson Prospero De Vera III na ibigay ang pangangailangan ng mga estudyante, at igniit na mas maraming pondo ang dapat ilaan para sa scholarship program.

“There’s a big difference between wants and needs. Maybe eto ‘yung checklist niyo pero mas kailangan siguro ng ating mga kabataan ngayon na mabayaran [ang tuition fees],” aniya ni House committee vice chairperson.

“Bilyon bilyon ang ginagamit natin dito sa mga paggawa ng guidelines, biyahe, bisita, research kunyari, pang-evaluate ng performance. Do we really need this huge expense?” dagdag pa ni Garin.

Ayon pa kay Garin, maaaring makipagtulungan ang CHED sa iba pang ahensya sa mga programang tulad ng Integration of Natural Green and Renewable Energy sa mga eskwelahan, na binanggit na may kaparehong proyekto ang Department of Environment and Natural Resources (DENR) at Department of Energy (DOE).

“Ang napapansin lang namin, CHED always says ang daming kailangan ng mga estudyante [but] apparently you are not that keen on directly giving the assistance to our students because we are at a point na ang dami ngayon na hirap na hirap na gumastos ng pang tuition because we are in the midst of challenging times,” sinabi ng mambabatas.

Noong 2023, iminungkahi ng CHED ang kabuuang expenditure program na P30.7 bilyon, na may P29.3 bilyon o 98.5 porsiyento na itinalaga para sa pagpopondo ng mga scholarship sa pamamagitan ng Higher Education Development Program (HEDP). 

Para sa 2024, tumaas ang panukalang badyet ng ahensya sa P31 bilyon; gayunpaman, nagkaroon ng bahagyang pagbaba sa alokasyon para sa HEDP, na ngayon ay nasa P29 bilyon.

#### wantta join us? sure, manure...