PAG-AARAL HINGGIL SA MOTORCYCLE TAXI, IPINABATID SA KOMITE NG TRANSPORTASYON

 

Nagpulong ngayong Martes ang Komite ng Transportasyon sa Kapulungan ng mga Kinatawan na pinamumunuan ni Antipolo City Rep. Romeo Acop upang dinggin ang resulta ng Motorcycle (MC) Taxi Pilot Study mula sa Department of Transportation (DOTr) at Land Transportation Office (LTO). 

Isinalaysay ni Rep. Acop na nagsimula ang pag-aaral noong 2017 bilang anim na buwang programa para sa operasyon ng aabot sa 27,000 motorcycle taxis sa Metro Manila. 

Ang pilot study ay opisyal na nagsimula noong 2019 kasama ang Angkas, MoveIt at Joyride bilang mga kalahok. 

Iniulat ni LTO Chief Assistant Secretary Atty. Vigor Mendoza II na ang pilot study ay patuloy pa rin, kung saan ang University of the Philippines (UP) - National Center for Transportation Studies ay nagsasagawa ng masusing pagsusuri sa kapasidad sa merkado ng mga MC taxi. 

Ayon kay ASec. Mendoza, isasaalang-alang ng pagsusuri ang epekto ng mga bagong kalahok sa programa, katulad ng Cloud Panda, Taxi Philippines Inc., E-PickMeUp Inc., Easyway Transport Service, Para Express Technology Services, Grab Philippines at Market Innovators Inc. 

Sa kaniyang pagtantiya, matatapos ang pinal na ulat sa loob ng 60 hanggang 90 araw. “Because of the need for further in-depth study specifically for the market capacity, as well as the results of the entry of new participants to the program, the TWG is asking for an extension of the program until such time that the committee is ready to pass a bill related to the operations of MC taxis," tanong ni ASec. Mendoza. 

Hinimok ni Bulacan Rep. Augustina Dominique Pancho ang LTO na isama ang Tricycle Operators and Drivers Association (TODA) sa patuloy na pag-aaral dahil sila ay maaapektuhan kapag ang bagong paraan ng transportasyon ay magagamit na sa publiko. 

Hiniling din ng Komite na isama sa pag-aaral ang epekto ng mga MC taxi sa ibang mga negosyo sa transportasyon. 

Inaprubahan din ng Komite ang mga sumusunod na lokal na panukalang batas: House Bills 9416, 9433, at 9546, na naglalayong magtatag ng mga tanggapan ng LTO sa distrito ng Maayon Capiz, at Ticao Island Masbate, ayon sa pagkakasunod. wantta join us? sure, manure...