RESOLUSYON NA LILIKHA NG MGA DFA CONSULAR OFFICES SA ILANG BAHAGI NG BANSA, PINAGTIBAY SA KAPULUNGAN

Pinagtibay ngayong Biyernes ng Komite ng Foreign Affairs sa Kapulungan ng mga Kinatawan, na pinamumunuan ni Pangasinan Rep. Ma. Rachel Arenas, batay sa istilo at amyenda, ang isang resolusyon na humihimok sa Department of Foreign Affairs (DFA) na magtatag ng regional consular offices sa ilang lugar ng mga mambabatas. 

Ang nasabing resolusyon ay ipinanukala ni Arenas matapos na iparating sa mga miyembro na sa nakagawian, ay iuulat ng Komite ng Foreign Affairs ang mga panukala na may kaugnayan sa usapin sa pamamagitan ng mga resolusyon. 

Ayon sa kanya, bahagi na ito ng mandato ng DFA sa ilalim ng Section 3 ng Executive Order 45 series of 2007. 

Ang resolusyon ang pumalit sa House Bill 2772 na inihain ni Negros Occidental Rep. Mercedes Alvarez; HB 3440 ni Bohol Rep. Maria Vanessa Aumentado; HB 3714 ni Oriental Mindoro Rep. Alfonso Umali Jr.; at HB 3899 ni Leyte Rep. Richard Gomez. 

Sa kanyang pambungad na mensahe, sinabi ni Arenas na napakahirap para sa mga Pilipino na makaakses sa mga pangunahing serbisyo ng pamahalaan, dahil bukod sa sobrang mahal ay nakakakonsumo rin ito ng mahabang oras. 

“The aim of these measures is to bring the DFA’s frontline services closer to the people,” pahayag niya. 

Samantala, inaprubahan ng lupon ang paglikha ng technical working group (TWG), upang mas higit pang talakayin ang mga panukala na naglalayong ayusin ang buwanang pensyon at mga disability benefits ng mga nagreretirong kawani ng DFA. 

Ito ay ang mga HB 4826 ni Cagayan de Oro City Rep. Rufus Rodriguez; HB 4916 at 4925 ni 1-PACMAN Party-list Rep. Michael Romero, Ph.D.; HB 4960 ni Pasig City Rep. Roman Romulo; HB 5033 ni Aklan Rep. Teodorico Haresco Jr.; HB 5047 ni Arenas; HB 5054 ni Iloilo City Rep. Julienne Baronda; HB 5210 ni Rep. Joseph Gilbert Violago; HB 5284 ni Rep. Gloria Labadlabad; HB 5320 ni Speaker Ferdinand Martin Romualdez; HB 5502 ni Rep. Bienvenido Abante; HB 5548 ni Rep. Ma. Cynthia Chan; HB 5679 ni Bohol Rep. Edgar Chatto; HB 5930 ni Rep. James Ang, Jr.; HB 5947 ni Rep. Antonio Albano; at HB 6108 ni Negros Occidental Rep. Jose Francisco Benitez. 

Sinabi ni Arenas na ang mga panukala ay naglalayong mabigyan ng maayos na kompensasyon ang mga retiradong Philippine Foreign Service Officers at personnel, dahil sa kanilang dedikasyon sa serbisyo bilang mga pangunahing ahente sa pagsusulong mga interes ng Pilipinas, pagsasaayos ng ugnayang panglabas, at ang pinakamahalaga ay ang proteksyon ng mga kababayang naninirahan at nagtatrabaho sa ibayong dagat. 

“Often their duties involve risking their life and limb, so as our way of showing our gratitude towards our diplomats and other DFA personnel, we will closely review and consider this measure” ayon kay Arenas. 

Hinirang si Committee on Foreign Affairs Vice Chair at Rizal Rep. Emigdio Tanjuatco III bilang chairman ng TWG.

wantta join us? sure, manure...

ULAT NG BICAM SA 2023 GENERAL APPROPRIATIONS BILL NIRATIPIKAHAN, PANUKALANG PH VIROLOGY INSTITUTE PASADO

Kagyat na naratipikahan ng Kapulungan ng mga Kinatawan na pinamumunuan ni Speaker Ferdinand Martin Romualdez ngayong Lunes, ang ulat ng bicameral conference committee report sa House Bill 4488, o ang 2023 General Appropriations Bill. 

Nilalaman ito ng P5.268-trilyong pambansang badyet para sa taong 2023. 

Nauna nang tiniyak ni Speaker Romualdez na maipapasa ang panukalang badyet bago magbakasyon ang Kapulungan. 

Inaprubahan rin ng mga mambabatas sa ikatlo at huling pagbasa ang HB 6452, na naglalayong itatag ang Virology and Vaccine Institute of the Philippines (VIP) bilang kaakibat na ahensya, sa ilalim ng Department of Science and Technology (DOST). 

Sa pamamagitan ng naturang panukala, imamandato sa VIP ang pagpapatupad ng mga polisiya, plano, programa, at mga proyekto para sa pagpapaunlad ng virology science and technology sa bansa, kabilang ang pagsusulong ng mga syentipiko at teknolohikal na mga aktibidad sa parehong mga pampubliko at pribadong sektor. 

Sasakupin nito ang lahat ng uri ng mga viruses at viral diseases sa mga halaman, hayup at mga tao. 

Bukod pa rito, isinasaad rin sa panukala na ang DOST, sa pakikipag-ugnayan sa Kagawaran ng Kalusugan, Kagawaran ng Agrikultura, at Department of Trade and Industry, ay bibigyan ng tungkulin na magpaunlad ng industry roadmap para sa mga produkto at mga serbisyo na lilikhain, paghusayin at palawakin ang pagsasaliksik ng VIP. 

Samantala, inaprubahan ng Kapulungan sa ikalawang pagbasa ang HB 6336, o ang panukalang “New Agrarian Emancipation Act”, isa pang prayoridad ng Legislative-Executive Development Advisory Council (LEDAC). 

Palalayain nito ang mga benepisaryo ng repormang agraryo mula sa pahirap na gastusin, sa pamamagitan ng pagpapatawad ng mga hindi nababayarang hulog at interes, at sila ay ililibre sa pagbabayad ng estate tax sa mga lupaing pang-agrikultura na iginawad sa ilalim ng Comprehensive Agrarian Reform Program. 

Ang ilan pang panukala na pasado sa ikalawang pagbasa ay ang: 1) HB 6 o ang panukalang "Open Access in Data Transmission Act”; 2) HB 6444 o ang panukalang “Waste Treatment Technology Act”; at 3) HB 6416 o ang panukalang "State Universities and Colleges (SUCs) Mental Health Service Act”. 

Pinangunahan nina Speaker Romualdez, kabilang sina Deputy Speakers Kristine Singson-Meehan at Camille Villar ang hybrid na sesyon sa plenaryo.

wantta join us? sure, manure...

MGA PINAGSAMA-SAMANG PANUKALANG BATAS HINGGIL SA PANGHABAMBUHAY NA PAG-AARAL, INAPRUBAHAN NG MAGKASANIB NA KOMITE

Inaprubahan ngayong Lunes sa pagdinig ng mga Komite ng Higher and Technical Education na pinamumunuan ni Baguio City Rep. Mark Go, at Basic Education and Culture na pinamumunuan ni Pasig City Rep. Roman Romulo sa Kapulungan ng mga Kinatawan, ang pagsasama-sama ng limang panukalang batas na may kinalaman sa panghabambuhay na pag-aaral. 

Layon ng mga House Bills 2286, 3130, 4025 at 4160 ang gawing institusyunal ang Lifelong Learning Development Framework at likhain ang Lifelong Learning Development Council. Ang mga ito ay iniakda nina Reps. Eduardo ‘Bro. Eddie’ Villanueva, Jernie Jett Nisay, Luis Raymund ‘LRay’ Villafuerte Jr., at Harris Christopher Ongchuan, ayon sa pagkakasunod. 

Samantala, layon ng HB 4582, na iniakda ni Rep. Gus Tambunting ang magtatag ng mga lungsod sa pag-aaral at pagsunod sa mandato ng kanilang mga pangunahing katangian. 

Habang nasa pagdinig, inendorso ang mga panukalang batas ng mga eksperto, kabilang dito ang tagapagsalita ng Coordinating Council of Private Educational Associations (COCOPEA) na si Atty. Joseph Noel Estrada; ang mga kasapi ng Commission on Higher Education (CHED) Technical Committee na sina Ma. Ninia Calaca at Jocelyn Beltran-Balanag; TESDA Deputy Director General Toni Umali; at Annabelle Balor ng Office of the Vice Chancellor for Academic Affairs ng University of St. La Salle sa Bacolod City. 

Kabilang sa mga layunin ng panukalang panghabambuhay na pag-aaral ang itaguyod ang panghabambuhay na pag-aaral bilang isang paraan upang makamit ang ganap, produktibo at malayang piniling hanapbuhay at disenteng trabaho para sa lahat, gayundin ang pagpapalakas ng mas tuluy-tuloy na pambansa, rehiyonal at lokal na pag-unlad. 

Samantala, sa sumunod na pagdinig, inaprubahan ng Komite ng Higher and Technical Education ang mosyon ni Rep. Antonio “Tonypet” Albano para sa pangkalahatang pag-apruba ng 25 panukalang batas, na magtatatag ng mga sentro ng pagsasanay at pagsusuri ng TESDA sa iba’t ibang bahagi ng bansa, gayundin ang pag-apruba ng kaukulang Ulat ng Komite.

wantta join us? sure, manure...

PAGSISIYASAT SA MGA UMANO’Y IREGULARIDAD SA NATIONAL COMMISSION ON SENIOR CITIZENS, IPINAGPATULOY NG DALAWANG KOMITE

Ipinagpatuloy ngayong Lunes ng Komite ng Public Accounts na pinamumunuan ni ABANG LINGKOD Party-list Rep. Joseph Stephen Paduano, kasama ang Espesyal na Komite ng Senior Citizens na pinamumunuan ni Senior Citizens Party-list Rep. Rodolfo Ordanes, sa Kapulungan ng mga Kinatawan, ang pagdinig hinggil sa House Resolution 236 na nanawagan para sa isang pagsisiyasat, bilang ayuda sa lehislasyon, sa kalagayan at pamamahala sa National Commission of Senior Citizens (NCSC), sanhi na rin sa naging privilege speech ni Ordanes noong ika-31 ng Agosto 2022 hinggil sa mga umano'y iregularidad, maling pamamahala, at anomalya sa NCSC. 

Sa kanyang pambungad na pananalita, inisa-isa ni Paduano ang mga usapin batay sa naging talakayan sa huling pagdinig na kanyang pinasimple sa limang paksa. Ito ay: 1) kung si NCSC Chairman Atty. Franklin Quijano, gayundin ang iba pang mga komisyoner, ay nabigong pamahalaan ang nasabing komisyon sa sapat na panahon; 2) ang di-umano'y hindi tamang appointment ng mga regional directors sa buong bansa na ginawa ni Quijano sa kanyang kapasidad bilang chairman at CEO ng NCSC; 3) ang umano'y solicitation at extortion activities na sinasabing ginawa ng isa pang senior citizens organization, na tinatawag na Senior Citizens Welfare Association of the Philippines (SCWAP); 4) ang umano'y kabiguan ng NCSC na parangalan ang isang presidential endorsement sa pagkuha ng executive director nito na pinatunayan ng isang papel mula sa Office of the President at nilagdaan ng dating executive secretary, at 5) kung inagaw o hindi ni Quijano ang kapangyarihan ng buong Komisyon sa pamamagitan ng unilateral na paghahanda ng badyet ng NCSC nang hindi kumukunsulta sa mga komisyoner. 

Samantala, positibo si Ordanes na ang ikalawang pagdinig ay magbibigay liwanag sa mga usaping nakapaligid sa organisasyon at operasyon ng NCSC, at winika niya na sa pamamagitan ng pamamaraang ito, ang mga usapin ay hindi lamang matutugunan kundi malalagay din ang NCSC sa wastong landas upang maisakatuparan ang mismong layunin kung bakit nilikha ang Komisyon. 

“We hope and fight for what is right and just for the millions of our senior citizens, and work to further improve the quality of life of the people who have already given their best years for this country,” ani Ordanes. 

Kabilang sa mga sinisiyasat ay ang mga nagawa ng Komisyon mula nang maupo si Quijano; ang bilang ng mga tauhan nito; kung paano ginastos ang 2020 budget na P25 milyon; at ang mga programa at proyekto na makikinabang ang mga senior citizens.

wantta join us? sure, manure...

MGA PANUKALA SA INTERNET TRANSACTIONS, MALAKAS NA ANTI-AGRICULTURAL SMUGGLING, AT IBA PANG PRAYORIDAD NA PANUKALA PASADO SA IKALAWANG PAGBASA

Inaprubahan ng Kapulungan ng mga Kinatawan, sa pamumuno ni Speaker Ferdinand Martin Romualdez, sa ikalawang pagbasa ngayong Martes ang House Bill 4, o ang panukalang "Internet Transactions Act”. 

Sa ilalim ng panukala, lilikhain nito ang Electronic Commerce Bureau, upang mas mapangalagaan ang mga konsyumer at mga mangangalakal na gumagamit ng mga online transactions. 

Ang Legislative-Executive Development Advisory Council (LEDAC) prayoridad na panukalang ito ay pangunahing iniakda nina Speaker Romualdez, Senior Deputy Majority Leader Ferdinand Alexander Marcos, at TINGOG Party-list Reps. Yedda Marie Romualdez at Jude Acidre. Layon nitong isulong at imantine ang masiglang eCommerce environment sa bansa, sa pamamagitan ng mga ligtas at maaasahang plataporma, kung saan ay may malinaw na transaksyon at ganap na maasahan. 

Ang HB 3917, ay mag-aamyenda sa Sections 3 at 4 ng Republic Act 10846, na kilala rin bilang "Anti-Agricultural Smuggling Act of 2016”, ay pumasa rin sa ikalawang pagbasa. 

Layon din nitong magpatupad ng mahigpit na parusa upang labanan ang malawakang smuggling ng tabako, gayundin ang pagharang sa mga pumapasok at pagbebenta ng iligal na tabako sa bansa. 

Ang mga smuggler ng mga produkto ng tabako ay mahaharap sa parusa na minimum na 30 taon sa bilangguan, at pagmumultahin ng dobleng halaga ng ipinuslit, kasama na ang halaga ng buwis, butaw at iba pang mga kabayaran na pinalusutan ng mga ipinuslit na tabako. 

Ang ilan pang mga panukala na pasado sa ikalawang pagbasa ay: 1) HB 6517, na nagpapalakas sa propesyunalismo, at pagsusulong ng pagpapatuloy ng mga polisiya at mga pagsisikap sa modernisasyon ng Armed Forces of the Philippines (AFP); 2) HB 4337, na nagdedeklara sa Ilocos Norte bilang Garlic Capital of the Philippines; 3) HB 6518, o ang panukalang "Health Emergency Auxiliary Reinforcement Team (HEART Act”); 4) HB 6522, o ang panukalang “Philippine Centers for Disease Prevention and Control (CDC) Act”; 5) HB 6510, o ang panukalang “New Philippine Passport Act”; 6) HB 6473, na nagtatatag sa Philippine Entrepreneurs Academy; at 7) HB 6483, na magpapahintulot sa mga mag-aaral sa kolehiyo na hindi nakabayad ng tuition at iba pang babayarin sa paaralan, na bigyan ng periodic at pinal na pagsusulit, na may kaakibat na maganda at makatarungang dahilan. 

Ang hybrid na sesyon sa plenaryo ay pinangunahan nina Deputy Speakers Kristine Singson-Meehan at Camille Villar.

wantta join us? sure, manure...

MGA PANUKALANG BATAS NA NAGDEDEKLARA NG PAMBANSANG ARAW NG MGA MAGSASAKA, PAMBANSANG ARAW NG ROTARY, INAPRUBAHAN NG KOMITE

Inaprubahan ngayong Miyerkules ng Komite ng Revision of Laws sa Kapulungan ng mga Kinatawan, na pinamumunuan ni Manila Rep. Edward Vera Perez Maceda, ang House Bill 1112, na nagdedeklara sa ika-22 ng Enero ng bawat taon bilang isang special working holiday na tatawaging “National Farmers Day”. 

Sinabi ni GABRIELA Rep. Arlene Brosas, may-akda ng panukalang batas, na noong ika-22 ng Enero 1987 naganap ang “Mendiola Massacre”.  

Ipinaliwanag niya na noong araw na iyon kung saan ang mga magsasaka sa pangunguna ng Kilusang Magbubukid ng Pilipinas (KMP), ay nagpasyang magmartsa sa Malacañang upang ipahayag ang kanilang kahilingan para sa tunay na repormang agraryo, ay marahas na itinaboy ng mga pwersang panseguridad, na nagresulta sa pagkasawi ng ilan. 

Sinabi ni Brosas na layon ng panukalang batas na bigyan ng nararapat na pagkilala at parangal ang mga magsasaka, na nakibaka para sa lupa at hustisya. 

Katulad nito, inaprubahan ng Komite ang mga HBs 2127, 2532, 3745, 4612 at 5009, na nagdedeklara sa ika-23 ng Pebrero ng bawat taon bilang isang espesyal na working holiday, na tatawagin bilang "National Rotary Day". 

Sa kaniyang pag-isponsor ng HB 2127, ipinaliwanag ni Baguio City Rep. Mark Go na ang petsang ito ay kasabay ng pagdiriwang ng anibersaryo ng Rotary Club of the Philippines. Sinabi niya na kinikilala ng panukala ang pakikibahagi ng organisasyon sa iba't ibang mga sosyo-sibikong mga layunin na tutulong sa pagbuo ng bansa.

wantta join us? sure, manure...

CONCURRENT NA RESOLUSYON NA MAGPUPULONG SA KONGRESO NG PILIPINAS AT PARLIYAMENTO NG BANGSAMORO, PINAGTIBAY NG KOMITE

Pinagtibay ngayong Martes ng Komite ng Local Government sa Kapulungan ng mga Kinatawan, na pinamumunuan ni Valenzuela City Rep. Rex Gatchalian. ang House Concurrent Resolution 3, na nananawagan para sa agarang pagbuo at pagpupulong ng Philippine Congress and Bangsamoro Parliament Forum, na ipinag-uutos ng Republic Act 11054, na kilala rin bilang "Bangsamoro Organic Law." 

Sa kanyang pambungad na pahayag, sinabi ni Lanao del Sur Rep. Yasser Alonto Balindong na ang HCR 3 ay inihain upang ang Parliyamento ng Bangsamoro ay maaaring makipagtulungan, at makipag-ugnayan sa mga inisyatiba sa lehislayon ng Kongreso ng Pilipinas sa pamamagitan ng isang pagtitipon. 

Ang concurrent na resolusyon ay inihain nina Lanao del Sur Reps. Balindong at Ziaur-Rahman Alonto Adiong. Gayundin, nagpahayag ng kaniyang suporta sa HCR 3 si Office of the Presidential Adviser on Peace, Reconciliation and Unity (OPAPRU) Secretary Carlito Galvez Jr. 

Inaprubahan din ng Komite batay sa mga susog at istilo, ang House Bill 4749, na naglalayong magbigay ng wastong delegasyon ng kapangyarihang pambatas, sa pamamagitan ng pagbibigay ng hurisdiksyon at paraan ng pagtanggal ng mga tiwaling opisyal ng Sangguniang Kabataan. 

Iniakda ni Gatchalian, aamyendahan ng panukala ang Section 21 ng Republic Act 10742 o ang "Sangguniang Kabataan Reform Act of 2015." 

Sinabi ni Gatchalian sa kanyang paliwanag sa nasabing panukalang batas na hindi nagbigay ng anumang hurisdiksyon ng korte, opisina, o tribunal sa pagtanggal sa sinumang opisyal ng Pederasyon. 

Nagbigay lang ito ng kapangyarihan sa Commission on Elections (COMELEC), Department of the Interior and Local Government (DILG), at National Youth Commission (NYC) upang maglabas ng mga alituntunin na namamahala sa pagtanggal ng mga opisyal. 

Gumawa din ng mga pagbabago ang Komite sa panukalang batas, tulad ng pagtiyak na ang mga pagkilos ng SK, kabilang ang mga imbestigasyon nito ay pinamamahalaan ng mga regulasyon, pati na rin ang pagsasama ng tungkulin ng tanggapan ng pagpapaunlad ng kabataan sa mga imbestigasyon. 

Sa huli, inaprubahan din ng Komite ang iba't ibang panukala na naglalayong magdeklara ng mga espesyal na non-working holiday sa ilang bahagi ng bansa.  Ito ang mga HBs 5269, 5295, 5435, 5533, 5725, 5929, 5942, 5964, 5965 at 6197.

wantta join us? sure, manure...

PROTEKSYON NG MGA MATATANDA LABAN SA PAG-ABUSO, ISINUSULONG NG BAGITONG MAMBABATAS

Isang bagitong mambabatas ang naghain ng panukala na magbibigay proteksyon sa mga matatanda laban sa pag-abuso.

Inihain ni Rep. Ernesto Dionisio Jr. (1st District, Manila) ang House Bill 109 na magbibigay proteksyon sa mga matatanda na biktima ng mga karahasan, pangalagaan at gabayan ng mga kinakailangang tulong upang matiyak ang kanilang personal na kaligtasan at seguridad. 

“This is also to prevent the recurrence of violent acts committed against them,” aniya. 

Sinabi ni Dionisio na ang kakulangan ng partikular o dedikadong batas upang maiwasan at maproteksyunan ang mga matatanda laban sa pag-abuso. 

“Enshrined in our Constitution is the duty of the State to design programs of social security for its elderly members,” aniya. 

Binanggit ni Dionisio ang isang pag-aaral noong 2004 na isinagawa ni Dr. Edna E.A. Co, isang propesor at dating Dean ng University of the Philippines-National College of Public Administration and Governance (UP-NCPAG), kung saan ay 40 porsyento ng mga sumagot na matatanda ay may personal na karanasan ng karahasan laban sa kanila. 

Ang pag-aaral ay may titulong “The Case of the Philippine Older Persons: Finding a Place in the Human Rights Domain” na nagpapakita na ang pinaka karaniwang umaabuso sa mga matatanda ay ang kanilang mga anak, at iba pang miyembro ng pamilya, na dapat sana ay sila ang nangangalaga sa mga matatanda batay sa kultura ng mga Pilipino. 

Ipinakita rin sa pag-aaral na ang pinaka pangkaraniwang uri ng pag-abuso na naranasan ay abusong pananalita. 

Tinukoy sa panukala na ang mga gawaing karahasan laban sa mga matatanda ay isinailalim sa limang kategorya tulad ng: 1) abusong pisikal; 2) abusong sekswal; 3) abuso sa damdamin o sikolohikal; 4) abusong materyal o pinansyal; at 5) pagpapabaya. 

Isinasaad sa panulaka na papatawan ng parusa ang krimen na karahasan laban sa mga matatanda alinsunod sa mga probisyon ng Revised Penal Code. 

Sa ilalim ng panukalang batas, ang karahasan laban sa mga matatanda ay ituturing na isang pambulikong paglabag. 

Kaya’t ang sinumang mamamayan na may personal na kaalaman na kinasasangkutan ng naturang paglabag ay maaaring maghain ng reklamo laban sa abusado.

wantta join us? sure, manure...

PANUKALANG GUIDE AT FREE LEGAL ASSISTANCE SA MGA MUPs, PASADO SA IKALAWANG PAGBASA

Inaprubahan ngayong Miyerkules sa ikalawang pagbasa sa Kapulungan ng mga Kinatawan, ang House Bill 1, o ang panukalang "General Financial Institutions Unified Initiatives to Distressed Enterprises for Economic Recovery (GUIDE) Act”. 

Layon nitong magbigay ng ayudang pinansyal sa mga micro, small, and medium enterprises (MSMEs) sa pamamagitan ng mga inisyatiba na ipatutupad ng Land Bank of the Philippines, Development Bank of the Philippines, Small Business Corporation, at Agriculture Credit Policy Council, tulad ng mga programa sa ayudang pautang at iba pang mga pasilidad sa pagpapahiram ng puhunan. 

Sa pamamagitan ng panukala, palalawigin ang mga programa sa pautang upang matulungan ang mga MSMEs na makamit ang kanilang pangangailangang pinansyal. Ipinasa rin sa ikalawang pagbasa ang HB 6509, na naglalayong magbigay ng libreng legal assistance sa mga opisyal at mga unipormadong tauhan ng Armed Forces of the Philippines (AFP), Philippine National Police (PNP), Bureau of Jail Management and Penology (BJMP), Bureau of Fire Protection (BFP), kabilang ang Philippine Coast Guard (PCG), sa lahat ng uri ng kriminal, sibil, o administratibong paglilitis na may kinalaman sa kanilang tungkulin. 

Kikilalanin ang panukala bilang “Free Legal Assistance for Military and Uniformed Personnel Act” na imamandato ang pagpapalakas ng mga tanggapang ligal ng AFP, PNP, BJMP, BFP at PCG. Ang mga pangunahing may akda ng panukalang HBs 1 at 6509 ay sina Speaker Ferdinand Martin Romualdez, Senior Deputy Majority Leader Ferdinand Alexander Marcos, kabilang sina TINGOG Party-list Rep. Yedda Marie Romualdez at Jude Acidre. 

Ang ilan pang panukala na ipinasa sa ikalawang pagbasa ay: 1) HB 6524, na mas lalong magpapalawig sa panahon ng pagpapatupad ng Agricultural Competitiveness Enhancement Fund (ACEF); 2) HB 6468 o ang panukalang “Green Public Procurement Act”; 3) HB 6558, na magpapatupad ng mga reporma sa real property valuation at pagtataya sa Pilipinas, at pagrereorganisa ng Bureau of Local Government Finance; 4) HB 6523 o ang panukalang "Revised National Apprenticeship Program Act”; 5) HB 6527 o ang panukalang “Public-Private Partnership (PPP) Act”; at 6) HB 6557 o ang panukalang “Magna Carta of Barangay Health Workers.” 

Pinangunahan nina Deputy Speakers Kristine Singson-Meehan at Isidro Ungab ang hybrid na sesyon sa plenaryo.

wantta join us? sure, manure...

PANUKALANG NAGPAPAHINTULOT SA DOH NA ITAKDA ANG KAPASIDAD NG MGA KAMA SA OSPITAL NG DOH, APRUBADO NG KOMITE

Inaprubahan ngayong Miyerkules ng Komite ng Kalusugan sa Kapulungan ng mga Kinatawan, na pinamumunuan ni Rep. Ciriaco Gato Jr. (Lone District, Batanes), ang substitute bill sa mga House Bills 288, 444, 975, 1565, at 5804, na nagpapahintulot sa Department of Health (DOH) na magtakda at aprubahan ang bed capacity at service capability ng lahat ng DOH-retained hospitals. 

Sinabi ni Gato sa kanyang pambungad na pananalita na ang panukala ay makakatulong sa pagpapahusay ng mabilis na paghahatid ng mga serbisyo sa pangangalagang pangkalusugan, dahil layunin nitong gawing simple ang pamamaraan para sa pag-apruba ng mga naturang pagsasaayos sa mga ospital ng DOH. 

Nilinaw ni Rep. Mark Go (Lone District, Baguio City), ang may-akda ng HB 975, na popondohan din ng panukalang batas ang kinakailangang pagtaas sa budgetary allotment at medical personnel. Magkakaroon ng Philippine Health Facility Development Plan, tulad ng tinukoy sa panukala, upang idirekta ang modernisasyon at mga plano sa pagpapaunlad, at upang ma-akses ang mga pamumuhunan sa paglalaan ng kapital bilang pagsunod sa Health Facilities Enhancement Program. Ipinahayag ni Director Theresa Vera ng DOH Health Facility Development Bureau ang kanyang buong suporta para sa pagpasa ng panukala. 

Ipinunto niya na maraming mga ospital sa DOH ang kumikilos nang lampas sa kanilang kakayahan upang makapaglingkod sa mas maraming pasyente, na nagreresulta sa labis na trabaho at hindi sapat na pondo para sa kanilang pangangalaga at operasyon. Inaprubahan din ng Komite ang ilang lokal na panukalang batas na lilikha, magpapabago, at magpapalit ng mga ospital sa iba't ibang bayan.

wantta join us? sure, manure...

SUBSTITUTE BILL SA MAHARLIKA FUND, PASADO SA LUPON NG APPROPRIATIONS

Inaprubahan ngayong Biyernes ng Committee on Appropriations sa Kapulungan ng mga Kinatawan, na pinamumunuan ni Rep. Elizaldy Co (Party-list, AKO BICOL), ang mga probisyon sa pagpopondo ng substitute bill sa House Bill 6398, na nagtatatag sa Maharlika Investments Fund (MIF), at naglalatag ng pamamahala, pamuhunan, at paggamit ng naturang pondo. 

Sa kanyang pag-isponsor sa panukala, sinabi ni Senior Vice Chairperson Rep. Stella Luz Quimbo (2nd District, Marikina City), na habang tinitiyak ng Kapulungan na tutulong ang 2023 General Appropriations Bill sa pagbawi ng ekonomiya, ito umano ay “not enough”. 

Nilinaw niya na ang pondo ng Maharlika ay pangangasiwaan ng mga propesyunal at may kalinawan, sa pamamagitan ng mga inilatag na pananggalang sa panukala. 

“Mamumuhunan tayo sa financial investments at sa mga proyekto na mataas ang tubo pero bitin ang kapital. Mr. Chair bitin ang kapital mula sa private sector dahil sa laki ng capital expenses. 

A sovereign wealth fund will be a gamechanger as a mechanism for raising funds. Imbes na hiwa-hiwalay ang galaw ng investments ng GFIs, mabuting pagsama-samahin ang investible funds nito para ma-manage professionally at ipuhunan sa malalakas na negosyo para mas mataas ang tubo,” aniya. 

Idinagdag ni Quimbo na ang pamuhunang ito ay titiyakin ng pamahalaan na maibabalik ang mga ipinuhunang pondo mula sa mga kapital na kasalukuyang hindi kailangan ng mga GFIs at GOCCs. 

“These additional investment returns can be used to augment the national budget to fund our ever growing needs as a nation,” aniya. 

Sa puntong ito, binanggit ni Quimbo na: 1) ang MIF Board of Directors ay aatasang magkaroon ng mga internal at external auditors; 2) maglilikha ng isang Joint Congressional Oversight Committee para mamonitor ang pamamalakad nito; 3) regular na mag-uulat ang Board sa Pangulo; 4) magtatakda ng mataas na kwalipikasyon para sa mga magiging miyembro ng Board; at 5) magtatakda ng gastusin sa operasyon at administratibo para sa Maharlika Investments Corporation. 

Nagpahayag ng suporta si Finance Assistant Secretary Jun Bernabe sa panukala, at sinabing isusulong nito ang paglago sa ekonomiya sa pamamagitan ng pagtulong sa mga government financial institutions, na mapangalagaan at mapalawak ang paggamit ng kanilang gastusin. 

Para kay Bangko Sentral ng Pilipinas (BSP) Deputy Governor Francis Dakila, binanggit niya rin makakatulong ang MIF na maisulong ang paglago ng ekonomiya, magpabilis sa paglikha ng mga trabaho, magpalawak ng imprastraktura, magpalakas ng connectivity, kabilang na ang pagkakamit ng seguridad sa enerhiya at pagkain. 

Samantala, binanggit ni Dakila na mag-aambag ang BSP ng 100 porsyento ng kanilang mga taunang dibidendo, hanggang ang kinakailangang halaga para simulan ang paglalagak ng pondo ay maabot na.

wantta join us? sure, manure...

10 December 2022 SCRIPT

10 December 2022 SCRIPT

🍎🍎🍎🍎🍎🍎 

𓄁𓃠𓆉𓅿𓃰𓃟𓆏 

(INTRO, BODY AND EXTRO) KATROPA SA KAMARA NI TERENCE MORDENO

HELLO, GOOD MORNING MGA KATROPA / GOOD MORNING, PILIPINAS / GOOD MORNING CAMP AGUINALDO, / MAGANDANG UMAGA  LUZON, MAAYONG BUNTAG VISAYAS / AT BUENAS DIAZ MINDANAO!

Waray - maupay nga aga

Kapangpangan - mayak a abak

Bicolano - marhay na aga,

Pangasinenese - maabug ya kaboasan

Maranaodan - mapiya kapipita

YES, ARAW NG SABADO NA NAMAN PO, AT / NANDITO NA NAMAN PO KAMI / PARA MAGTANGHAL / O MAGSASA-HIMPAPAWID / NG ATING PALATUNTUNANG / KATROPA SA KAMARA NI TERENCE MORDENO GRANA. 

 

BAGO TAYO LUMAON, / UNAHIN MUNA NATING MAGPAHAYAG / NG ATING MGA PASASALAMAT. / MAGPASALAMAT O PASALAMATAN NATIN / OF COURSE ANG ATING PANGINOONG MAYKAPAL / SA KANYANG PAGBIBIGAY NG GRASYA’T KALOOB / LALO NA SA NAKALIPAS NA MGA ARAW / NA TAYO AY  PUNONG-PUNO / NG MGA BIYAYANG ATING TINAMASA / AT TAYO AY BINANIGYAN NIYA NG PAGKAKATAON / NA MAKAPAGSAGAWA / NG ATING MGA ATAS / SA ARAW ARAW / PARA SA KANYANG KALUWALHATIAN.

SUNOD NATING PASALAMATAN / AY ANG ATING MGA OPISYAL / SA ARMED FORCES OF THE PHILIPPINES: UNANG-UNA ANG ATING COMMANDER IN CHIEF PRESIDENT FERDINAND BONGBONG MARCOS, JR / SI NATIONAL DEFENSE DEPARTMENT OFFICER IN CHARGE, UNDERSECRETARY JOSE FAUSTINO JR / SI LTGEN BARTOLOME VICENTE “BOB” BACARRO  / ANG ATING AFP CHIEF OF STAFF, / AT ANG ATING BAGONG COMMANDER NG CRS, SI BGEN ARVIN LAGAMON / AT OF COURSE, / SA ATING MCAG GROUP COMMANDER & DWDD STATION MANAGER MAJ CENON PANCITO III / AT ANG LAHAT NG MGA BUMUBUO / NG ATING PRODUCTION STAFF / - THANK YOU VERY MUCH PÔ.

NGAYON / NAIS KO PO MUNANG MAKI USAP SA INYO / NA KUNG PUWEDE / PAKI-LIKE AT PAKI-SHARE / NITONG ATING PROGRAMA.

YES, / TERENCE MORDENO GRANA PO / ANG INYONG LINGKOD, / ANG INYONG KAAGAPAY AT GABAY SA ATING PALATUNTUNAN.,

MOBILE PHONE NUMBER NA: +63 916 500 8318‬ AT +63 905 457 7102

ANG KATROPA SA KAMARA AY MATUTUNGHAYAN, EKSKLUSIBO, DITO LAMANG PO SA DWDD, KATROPA RADIO, ONSE TRENTA'Y KUWATRO SA TALAPIHITAN NG INYONG MGA RADYO, SA ATING FACEBOOK PAGE, LIVE TAYO SA KATROPA DWDD-CRS VIRTUAL RTV (RADIO AND VIRTUAL TELEVISION) AT SA YOUTUBE AT I-SEARCH LANG ANG DWDD KATROPA.'

OKEY, NARITO NA PO ANG ATING MGA NAKALAP NA IMPORMASYON MULA SA KAMARA DE REPRESENTANTES:

----------------

OKEY, HUWAG PO LAMANG KAYONG BUMITIW AT KAMI PO AY BABALIK KAAGAD MATAPOS ANG ILANG MGA PAALAALA MULA SA ATING HIMPILAN.

----------------

SA ATING PAGBABALIK, KAYO PO AY NAKIKINIG SA PATATUNTUNANG KATROPA SA KAMARA NI TERENCE MORDENO GRANA DITO LAMANG SA HIMPILANG DWDD, KATROPA RADIO, AT TAYO AY SINASAMAHAN NINA ENGINEERS (RONALD ANGELES, PHERDEE BLUES, LEONOR TANAP, REGINE ASCAÑO, JAYTON DAWATON,  JOHN MARK MOLINA, ETC) SA ATING TECHNICAL SIDE.

OKEY, TULOY-TULOY NA PO TAYO SA IILAN PANG MGA BALITA NA ATING NAKALAP. 

(READ AGAIN THE OTHER NEWS AND INFORMATION)

——————

SA PUNTONG ITO, MGA KATROPA AY DADAKO NA PO TAYO SA ATING PAGBABALIK-TANAW O RECAPITULATION NG LAHAT NA ATING TINALAKAY NA MGA PAKSA AT MGA BALITA NA AKING IBINIGAY SA INYO KANINA BAGO TAYO MAGTAPOS NG ATING PALATUNTUNAN...

-------------------

HAAY, UBOS NA NAMAN PO ANG ATING DALAWANG ORAS NA PAGTATANGHAL NG ATING PALATUNTUNAN AT WALA NA NAMAN PO TAYONG ORAS. KAMI AY MAMAMAALAM NA NAMAN MULI MUNA PANSAMANTALA SA INYO.

MARAMING SALAMAT AT KAMI PO AY INYONG PINAHINTULUTANG PUMASOK SA INYONG MGA TAHANAN SA PAMAMAGITAN NG ATING PALATUNTUNANG KATROPA SA KAMARA.

DAGHANG SALAMAT USAB SA ATONG MGA KAHIGALAANG BISAYA NGA NAMINAW KANATO KARONG TAKNAA. 

ITO PO ANG INYONG LINGKOD – KINI ANG INYONG KABUS NGA SULUGUON, TERENCE MORDENO GRANA..

SA NGALAN DIN NG LAHAT NA MGA BUMUBUO NG PRODUCTION STAFF SA ATING PALATUNTUNAN, AKO PO AY NAGSASABING: PAGPALAIN SANA TAYONG LAHAT NG ATING PANGINOONG MAYKAPAL, GOD BLESS US ALL, AT PURIHIN ANG ATING PANGINOON! GOOD MORNING.

wantta join us? sure, manure...